මහ රෑ

පාන්දර දෙක හමාරට කිසි එකෙකු නැතිවත් ගමන් තලයේ
වීදි එළි හා තරඟ කරමින් පුංචි බොල් පිනි වැටෙයි ජලයේ
හොඳක් නොහොඳක් දෙකට නොබෙදන පන්ති කඳු ගැට හිඳියි වැටියේ
වැදී ගල් පරයකින් පහතට වැටෙයි පණ නැති හරිය නදියේ

ඇතැම් තැන් වල වවුලු වාසේ හෙළා දකිමින් තමන් තරයේ
එකඟ නොවමින් ගේන මතයට නැගෙන කච කච සද්ද බෙනයේ
තවද පහළට නැමී උණ බට හොරෙන් ගග සිපඟන්න හරියේ
හෙමින් පාරුව වැනෙයි දෙපසට තොටිය ඇයි නිදි නැතුව හිටියේ

කපුටු කූඩුව ළඟට ඉගිළී ගිහින් හංගල ආව බිත්තර
කොවුලු අප්පෙක් වමාරනවලු කපුටු බිත්තර කැඩුව විස්තර
කවුද ඇඳලු ලෙනෙහි දඩයම් කරන සී.සී.ටී.වි චිත්තර
කවුරු කවුරුත් කතා කෙරුවේ නඩුව දවසෙදි දෙන්න උත්තර

රැයක තනිපංගලමෙ අහසක තියෙන තරු කැට එකට එක්කර
කවුද බල්ලා කවුද වලසා අසන විටෙකදි අතක් දික්කර
ගනන් කරගෙන දෙකෙන් බෙද බෙද ගුණිත වගු ගොඩ නගන චක්කර
ආං අර පේනවද ගෙම්බෙක් අහසෙ වෙන් කරනවා අක්කර

Krishan rathnayake